جـــولـة الباديــة
لا ننسى عاداتْنا يا ذالحُضْــرا
..........وْنحْكي على التاريخْ نُضْرُبْ تجْوالة
قلْبي فرْفرْ شاقْ للْبيتْ الحمْرا
..........بالْمُقْرة حنّاتْ طابعْ لعْمالــــــــــــــــة
ارْجالْ ابْميعادْ شيّاخة حُضْـرا
..........وْعُقبْ الليل اتْباتْ تمْدحْ جلْجالـــــــة
أزْرابة وافْراشْ والرقْمة حُرا
..........وْزخْرافة بالْوانْ تعْطي دلالـــــــــــــة
أشْكالْ وْرُسومْ ترمُزْ للصحرا
..........تحْكي عنْ اسْنينْ فاتتْ طـوّالــــــــــة
اسْنيّاتْ امْزوقة تجْلبْ نظْــرا
..........والقهْوة والتّايْ منْها سيّالـــــــــــــة
الشكْوة برْباطْ فوقْ الحمّــارا
..........بالعفْصْ وْ عرْعارْ ريحة فعّالـــــــة
فوّاحة ابْجرْتيلْ و الدبْقة عطْرا
..........اشْرُبْ يا معْلولْ لبنْ الموّالــــــــــة
سلكْ امْرارة فيهْ للساقمْ يبْـــرا
..........منْ النعْجة فالبرْ ترْعى جـوّالـــــــة
واقْداحاتْ الْبانْ تحْضرْ فالْمــرا
..........غرسْ وْ دقْلةْ نورْ ليها بجّــــــالـــة
الملّة فالْكانونْ طابتْ بالجمْــرا
..........حرْشاية واحْليبْ ليها وكّـــالـــــــــة
جبنْ ابْقفْصْ ابْياضْ نعْتو جُمّارا
..........طبيعي فُرْماجْ منْ صُنعْ الْخـــالــــة
والقرْبة بامْياهْ سالتْ شرْشــارا
..........بنّتْ مسكْ اتْزيدْ تعْطي مثْقــــــــالــة
جلْبتْلي لنْظارْ ركْبيا عطْــــــــرا
..........ورْياهة للْخيرْ ديمة صهّـــالـــــــــة
الرقبة بسْبيبْ بيها نعّـــــــــــارا
..........مسْروجة للْقومْ عنْها عـــوّالــــــــة
منْ لحْيالْ الْهيهْ تلْقى جرْجـــارا
..........ابْنقْراتْ الْخلْخـالْ تقضي جيـــــالــة
الضيفْ الكريمْ ليها ببْشــــــــارا
..........بالرفْسة وادْهانْ مـاهي طـوّالــــــة
كرّامة للضيفْ ذيكْ المسْــــرارا
..........اطْعامْ الْكُسكُسْ ليهْ ديمـة فتّالـــــة
صفتْها غزالْ تسْلبْ بالنظْـــــرا
..........ما يامنْ صيّادْ جاوهْ ختّـــــــالــــــة
الْعينينْ السودْ خُمْرية سـمْــــرا
..........واحْواجبْ عالْعينْ دارو هلاّلــــــــة
فوقْ اكْتافْ اشْعورْ رابتْ مظْفـورا
..........كمّوسة بالطّيبْ للنّيفْ اقْبالـــــــــة
الْباسْ الحشْمة زادْ فالْهمّة كُبْــــرا
..........,وْ بالشعرْ الملْحونْ عنْها قـوّالـــة
امْلاحفْ الْوانْ بانو سحّــــــــــــارا
..........واحْزامْ البثْرورْ سلْكـو يتْلالـــــــــة
تكْليلة وْ مسْلوتْ في وذنْ الـبتْـــرا
..........خُرصْ القصّة و الْعواشقْ شـعّـالــة
الشّدْ والشنْبيرْ والقشْطة صُــــــرا
..........والْخُمْـري منْسـوجْ بالدّقْ أُخْلالــــة
الـمدْورْ لمّـاعْ و الْحولي سُتْــــــرا
..........وامْشبّكْ وسْـوارْ فضّة وْ خـلاّلــــــة
أجحافْ اعلى البلْ فاتتْ سيّــــــارا
..........وْمرْحـولْ الخـوداتْ فيهُمْ سوّالــــــة
الجحْفة موْجاتْ ماحتْ بالْعـــــطرا
..........اتبّـعْ في خطْواتْ لحْجـــلْ عـدّالــــة
وارْجالْ البارودْ بالْباسْ الفُخْــــــرا
..........غي فرْسانْ اطْيورْ حامـو مـيّـالـــــة
منْ راسْ المشْوارْ دارو غبّــــــارا
..........اهْـرُبْ يا علاّلْ جـاوْ الْخـيّــالــــــــة
العرْبي و القابْسي ماهُمْ عُـــــــــرا
..........دُخّانْ اكْحلْ غيمْ دايرْ ظُلاّلــــــــــة
ازْغاريتْ الْحانْ للضّايمْ يـبْــــــــرا
..........تمْسحْ كُلْ اقْلـوبْ واتْنحْ ازْلالــــــة
احْني وْضاياتْ غابة بالســــــــدْرا
..........واشْعابْ وْ خُلْجانْ ودْيانـو حــــالة
البُطْمة باظْلالْ بانتْ شـــــــــوارا
..........مقْصدْنا فالْــحرْ فيها قــــيــــــــالة
اللّكْ وْ زبُّوجْ فالْــــوادْ أُعْـــــمـارا
..........والزّاوشْ وزْوازْ دايرْ حـلْـحـــــالـة
أُعْقبّة و اطْيورْ سكْـنو وكّـــــــارا
..........عنْ لرْنبْ و احْبارْ عاشـو مدْلالـــة
وْلاتامنْ حجْلاتْ طارو صــــفّارا
..........والثبّتْ فالسيـرْ و أقْـرا الـبسْـمالــة
الثعْلبْ والذيبْ طبعْ المكّـــــــارا
..........صيّادة فالبرْ يمْشـو دهْكـــالــــــــــة
القوبعْ و الترشْ منّكْ فـرْفـــارا
..........وْ مُسيْسي والدُخْ طارو مذْلالـــــــة
اصْرنْدي و الصـوّاقْ ماهُمشْ احْيارا
..........والّهاياتْ أُرْكاكْ لُحتْ الـــدرْبالـــــة
والْجرْبوعْ أمْعا الجرْدة في زغْـــــــرا
..........ميراقة واعْفارْ دارو شغْلالــــــــــــة
والقنْفودْ امعا الزواقدْ في سهْـــــــرا
..........والورْنة والضّبْ ديمة صـــوّالــــــة
امْعاذرْ وامْروجْ شعّاعـة خضْــرا
..........مخْروفة و ارْبيعْ جادتْ غــسّالــــــة
الخدّة والرُقّـــــــــيمْ تفْلى درْدارا
..........حُمّيضْ وْ خُبيزْ للْمة كــمّــــالــــــــة
مرّيوتْ و الْخافورْ و الْفيجلْ تـارا
..........تالْمة والترْثوثْ مانا قدّالـــــــــــــــة
الْعجْرمْ و اقدادْ وارْماثْ وْ شجْـــرا
..........كُمّيشْ وْ لوّايْ خبّلْ تخْـــبالـــــــــــة
والقيزْ ابْعسْـلوجْ دارْ النُــــــــوارا
..........خيّاطة و اشْنافْ نجمْ وْ خُرْطــــالــة
الحلْفة بالدقْموسْ دارتْ جُمّــــارا
..........والْباقلْ بأكْداهْ خوذْ الْحــمّالـــــــــــة
الجوْبرْ والترْفاسْ مطْيبْها صُفْــرا
..........سُبْحان الله خالْقو ذو الجلالـــــــــة
الّي قالْ الأبْياتْ جاتو ذالفكْـــــــرا
..........منْ صُغْرو شفّايْ عرْشـو رحّـــالـة
ينْضحْ بالّي فيهْ باشْعارو يقْــــــرا
..........متْفكّرْ لرْصامْ منهُمْ في حـــــــالـــة
عايشْ في خيالْ مطْيبْهـا عشْــــرا
..........وْ متْفكّرْ ميعادْ ذوكْ الـرجّـــالـــــــة
ابْقاوْ اعلى خيرْ راجـعْ للــدشْـــرا
..........الباطيمة عـلاّتْ دارتْ خيـّالـــــــــــة
ادْروجْ وْ كرْلاجْ تطْلـــــــــعْ دوارا
..........وْ فالثاني إيطاجْ بانتْ طـــلاّلــــــــة
اثْمنيا واتْلاثينْ رقْمي يا حُضْـــــرا
..........وْ مكْتوبة في البـاب ليكُمْ دلاّلـــــــة
مرحــــبا بضْيوفْ ليّا زيّــــــــــارا
..........وحيدْ وْ لولادْ بيـكُمْ وهّــــــــــــالـــة
